Carabela de Ares: 2017

20/12/17

BO NADAL

Os alumnos do CPI As Mirandas deséxanvos un Bo Nadal en Lingua de Signos con esta canción de SES, titulada Tambores de mar. Felices Festas!!!

18/12/17

CANDO MARTIÑO TIVO GAÑAS DE MEXAR NA NOITE DE REIS.

Este luns tivemos con nós a Aída, da Asociación Cultural Apelón Educación que nos estivo contando "Cando Martiño tivo gañas de mexar na noite de reis" de Chema Heras e Kiko Dasilva. Pasámolo fenomenal... e queríamos máis historias.

13/12/17

XA VEN O NADAL!!!

E Carabela encantada!!!

CURSO DE ROBÓTICA

Este curso, seguimos apostando pola formación en centros que levamos facendo dende hai un tempo a través do PFPP, que este ano adicamos a " Introducción á robótica en E.P. " Ao longo deste curso recibiremos formación en construcción e programación de robots MBOT. Tino Fernández Cueto, mestre do CIPF Ferrolterra deunos a primeira formación. Estamos moi ilusionados con este novo proxecto!!!

ESCOLA DE XADREZ

ESTE CURSO QUIXEMOS POÑER EN MARCHA UNHA ESCOLA DE XADREZ PARA TODOS AQUELES NENOS E NENAS QUE NON SABEN XOGAR E QUE QUEREN APRENDER COS SEUS COMPAÑEIROS. NO MES DE XANEIRO, COMEZARÁ O TORNEO. MOITA SORTE A TODOS!!!!

27/11/17

ENTREGA DOS PREMIOS DO I CONCURSO DE FOTOGRAFIA XUVENIL CONCELLO DE ARES

Esta tarde na Biblioteca do Concello, Alma Barrón(concelleira de cultura) e José Juan Vilar (concelleiro de servizos) fixeron entrega dos premios do I Concurso de Fotografía Xuvenil.

As fotografías dos rapaces e rapazas gañadores son as que ilustran o calendario do Concello para este próximo ano 2018, e que foi presentado neste acto.

Desde o CPI As Mirandas queremos dar a noraboa aos rapaces e rapazas que presentaron as súas instantáneas ao concurso, fotografías que poderemos ver todos no calendario deste ano.

20/11/17

O ÚLTIMO BALENEIRO

Hoxe, contamos coa visita de Miguel López Pérez , un veciño de Ares que é " o último baleneiro ". Contounos moitas cousas interesantes, por exemplo como pescaban as baleas, como as transportában, diferencias entre un cachalote e unha balea, o que comen... A verdade, foi un gran placer escoitalo, os alumnos e alumnas de 1º de E.P. quedaron abraiados. Grazas Miguel.

10/11/17

RETRANSMITINDO O VINDEL

Alumnos galegos e portugueses realizarán o programa “ radiovisual ” RETRANSMITINDO O VINDEL con motivo do DÍA INTERNACIONAL DO PATRIMONIO e da presenza en Vigo do pergamiño de Martín Códax. Ponte...nas ondas! retransmitirá a través do portal Web www.escolasnasondas.com a partir das 11.00 hs. un magazine audiovisual con persoas convidadas que abordarán diferentes aspectos das cantigas de amigo e do pergamiño Vindel.

Np retransmitindo o vindel de satelite1

Magosto 2017

Hoxe celebramos o Magosto no noso cole. As protagonistas foron sen dúbida as castañas.
Fixemos diferentes xogos:

A Raia
Rastaña
De vaso en vaso
Carreira de culleres
Chapastaña
Os transportistas

Pasámolo moi ben....

9/11/17

O alumnado de primaria rompe fronteiras cos Ghazafelhos

Hoxe rompemos fronteiras. Hoxe a Lúa baixou á Terra. Hoxe os nenos e nenas emocionámonos unha vez máis cos Ghazafelhos. Grazas a todos eles por darnos unha mellor visión do mundo.

Seguiremos en contacto coa Lúa...

8/11/17

ACTIVIDADE POLO DÍA DAS BIBLIOTECAS ESCOLARES.

O pasado 24 de outubro foi o Día das Bibliotecas, e deseñamos unha actividade literaria: Son poeta porque me peta. Consistiu na elaboración colaborativa dun conto en verso onde quedou plasmada a inventiva de cada un. Aquí queda o resultado.

Son poeta porque me peta de Francisca Pérez

3/11/17

O TEMPO DA FIN DE SEMANA CON HUGO E UXÍA

Parece que volven as choivas!!!. Todas as novedades do tempo de cara a fin de semana contadas por Hugo e Uxía de 5º de primaria.

2/11/17

I PREMIO CIENCIA, ARTE E LITERATURA: AS EMOCIÓNS ENTRONCADAS.

Con motivo da celebración do día da Ciencia en Galego, o departamento de Bioloxía-Xeoloxía, o departamento de Lingua Galega e o Equipo de Dinamización Lingüística propoñen un proxecto para achegar a ciencia ao mundo da Arte a través das letras, no que o alumnado xoga un papel protagonista. O proxecto desenvólvese en tres fases.

Na primeira semana, o departamento de Bioloxía-Xeoloxía proporciónalle ao seu alumnado 33 fotografías das presentadas aos premios VII premio de fotografía de la ciencia 2016, Wildlife 2017, Stunning science 2017, Best microscope photo of the year 2017, sen título nin autor, xunto cun formulario para que os discentes de cada grupo seleccionen as 7 fotografías que máis lles gustan.

A continuación, na materia de Bioloxía-Xeoloxía, as 4 fotografías máis votadas por ese grupo distribúense en subgrupos, para que cada subgrupo traballe cunha soa fotografía. Se houbera empate en distintos cursos, priorízanse os niveis inferiores sobre os superiores, para facilitarlles a análise das fotografías elixidas, debido ao seu menor percorrido académico. Unha vez que cada subgrupo ten asignada unha fotografía comeza a segunda fase.

Na segunda fase, cada estudante de cada subgrupo achega un fragmento dun texto literario en prosa ou en verso, seleccionado da Biblioteca Virtual de Galicia, que escollen na casa, para poñer voz ás fotografías máis votadas da súa aula, tendo en conta o criterio Que emocións, sentimentos che producen estas fotografías?.

Cada texto seleccionado irá cunha xustificación do porqué se seleccionou ese texto. Logo, na materia de Lingua Galega, os estudantes de cada subgrupo escollen so un texto, aquel que eles consideren que mellor se adapta ao que lles transmite a fotografía.

Por último, na derradeira fase, na semana da ciencia en galego, realizarase a exposición-concurso Ciencia, Arte e Literatura: as emocións entroncadas. Expoñeranse as 20 fotografías seleccionadas, co pé de foto que indica o autor/a, título orixinal, premio fotográfico, texto literario escollido e autores da selección. Ademais, proponse que na hora de lectura do día 6 de novembro se lean eses textos e que algún membro dos grupos xustifiquen a selección dese texto.

Un grupo de expertos (docentes das áreas de Ciencia, Arte e Literatura) premiará as tres mellores asociación de foto-texto seguindo os criterios que se enumeran nas bases do concurso.

Xurado: Departamento de Matemáticas, Departamento de Física e Química, Departamento de Xeografía e Historia, Departamento de Língua Castelá, Departamentos de Francés e Inglés e Equipo de Dinamización Lingüística.

A exposición estará aberta ao público en xeral na semana da Celebración da Ciencia en Galego, do 6 ao 12 de novembro na entrada do edificio administrativo do CPI As Mirandas.

Agradecemos a colaboración da Concellería de Educación do Concello de Ares. Posteriormente as fotografías exhibiranse nos locais do Concello (Biblioteca, Casa da Xuventude...)

LOVA

Este foi o resultado dun traballo innovador que nos encheu de esperanza ao comprobar que hai moitas formas de ensinar e aprender distintas das tradicionais.

11/10/17

I CONCURSO DE FOTOGRAFÍA XUVENIL DO CONCELLO DE ARES

O Concello de Ares a través da súa concellería de cultura organiza o I Concurso de fotografía xuvenil do noso concello, do que sairán as 6 fotografías que se incorporarán ao calendario municipal do 2018 que se distribúe entre toda a veciñanza e comarca.

O obxectivo deste concurso é convidar á xuventude a utilizar a nosa contorna como contexto onde recoñecer a súa herdanza a través das imaxes, despertanto a capacidade de observar todo o que lles rodea e recoñecerse en pequenas historias e/ou paisaxes que dean conta do seu vencellamento como memoria colectiva desta vila. En concreto, invítase a fotografiar espazos, lugares, obxectos, actos e situacións da nosa contorna que consideren parte da súa identidade.

Quen pode participar?: Xente nova de 8 a 18 anos empadroada en Ares.

Cómo participar?: Poderanse enviar un máximo de dúas fotografías en formato dixital e sen retocar ao enderezo electrónico: concursofotografia@concellodeares.com. Xunto ás fotografías remitirase o formulario de solicitude de participación e de identificación das fotografías cubertos, asinados e escaneados.
Prazo de entrega: Dende o luns 16 de outubro ata o luns 6 de novembro ás 19.30 (ambos inclusive)

De tódolos xeitos aquí deixamos as bases completas do concurso.

ANIMÁDEVOS A PARTICIPAR!!!!

Bases concurso fotografía concello de Ares de Yolanda Castro

Formulario 1 de Yolanda Castro

Formulario 2 de Yolanda Castro

4/10/17

Como identificar noticias falsas – IFLA

A IFLA (International Federation of Library Associations and Institutions) publicou hai un tempo esta infografía na que se lembran algúns aspectos a ter en conta á hora de valorar a información e a fiabilidade das noticias: How To Spot Sake News

Traducida ao galego, lembrámola nestes comezos de curso como unha ferramenta para a imprescindible alfabetización en información, na que podemos ir introducindo ao alumnado desde ben pequenos, e aproveitando o interese polos temas que xorden no medio ou no transcurso das investigacións que realicen nas diferentes fases dos seus traballos. (Agradecemos a Manuel Iglesias Fernández a tradución ao noso idioma).

2/10/17

PINOCCHIO SON EU

O venres 29 de setembro os nenos e nenas de primeiro e segundo curso de educación primaria saímos de visita á Casa da Cultura de Pontedeume. Alí nos esperaban Nino "Pinocho" e os seus pais para amosarnos unha marabillosa exposición educativa de arte. Unha visita guiada onde nos permitiron experimentar grandes momentos da fantástica aventura de Carlo Collodi xunto coas obras orixinais e interactivas realizadas en papel e cartón, pola artista Catarina Capim.

Pasámolo xenial!!

25/9/17

O NOSO EQUIPO DE COLABORADORES

E xa temos as fichaxes deste ano: un equipo de 27 colaboradores da biblioteca que comenzarán o seu labor o próximo luns 2 de maio. O mellor equipo do mundo.

21/9/17

ESTAMOS EMPEZANDO...

Xa queda pouco para que a nosa biblioteca abra as súas portas. Levamos toda a semana con sesións de formación dos colaboradores e xa contamos cun gran equipo de profesionais dos cursos de quinto e sexto. Ídevos preparando que a próxima semana abrimos. Seguiremos informando.

20/9/17

Aprender a pensar coa biblioteca escolar

Aprender a pensar coa biblioteca escolar" é o lema escollido para os materiais que a Consellería de Cultura, Educación e Ordenación Universitaria edita a comezos do curso 2017/2018 con destino ás bibliotecas escolares dos centros educativos galegos. O ilustrador Xosé Tomás foi o encargado, nesta ocasión, de realizar a interpretación gráfica do lema anual.

A experiencia de Xosé Tomás como profesor de inglés no CPI Manuel Suárez Marquier (O Rosal), centro que conta cunha biblioteca moi activa, sen dúbida está detrás da amplitude de posibilidades que imaxina na súa recreación gráfica.

Atender a biblioteca escolar do centro supón, para comezar, o reto de deseñar un espazo no que poidan pasar cousas. Un espazo que acolla a todos e todas e que mesmo (como na ilustración de Xosé Tomás), teña a capacidade de "abducir" as persoas usuarias, de trasladalas a situacións gratas de aprendizaxe. Seleccionar os materiais, organizar os recursos, facilitar o seu uso e organizar as actividades para a biblioteca escolar son tamén actuacións que, segundo o enfoque e o criterio co que se realice, poden facilitar ou dificultar esas aprendizaxes posibles.

Unha biblioteca escolar actualizada no seu modelo, nos seus recursos e equipamentos, nas súas propostas; atendida con profesionalidade e integrada no día a día do centro educativo, supón unha oportunidade única para axudar a nenas e nenos a desenvolver o seu pensamento crítico, a "aprender a pensar".

Aprender a pensar a través dos contos, da tradición oral, das lecturas de ficción, da poesía, do teatro; a través das lecturas de materiais de divulgación científica, a través das investigacións. Aprender a pensar co cine e coa música. Aprender a pensar a través do diálogo, nos clubs de lectura, nas actividades compartidas. Aprender a pensar baixo a guía e orientación dun profesorado consciente da importancia da curiosidade como motor vital e, tamén, da importancia de activar no alumnado os mecanismos para desenvolver o pensamento complexo. Aprender a pensar nas clases de filosofía, pero tamén fóra das aulas regladas, onde a vida flúe en todo o seu misterio. A biblioteca escolar é un espazo privilexiado para que o alumnado non perda a súa capacidade de asombro; para que aprenda a formularse preguntas diante dos distintos fenómenos naturais ou sociais e, tamén, a procurar algunhas respostas á complexidade que lle toca vivir.

18/9/17

BENVIDOS AO NOVO CURSO 2017-2018

Xa estamos de volta!. A biblioteca de novo abre as súas portas.

O verán rematou e queremos empezar o novo curso con alegría.

Aínda que seguro que moitos de vós non deixastes de ler nestas vacacións, animámosvos a visitar desde primeiros de outubro a nosa biblioteca escolar.

Temos moitos proxectos na cabeza para poder traballar ao longo do curso e para levalos a termo, contamos coma sempre coa vosa colaboración.

E sobre todo o noso obxectivo é VOLVER a ofrecerche recursos atractivos, maxia, misterio, animacións... posibilidade de elaborar proxectos,de documentarte,de ler e escribir,de coñecer escritores,de tomar prestados libros,de fomentar valores,de gozar e aprender co noso concurso “O Preguntón”... Alegría e diversión non che faltarán.

Achégache á nosa bibliotec@, nela atoparás un mundo de información e diversión.

27/6/17

Entrega de premios do I Concurso " Cantamos con las manos "

Como sabedes o noso cole presentouse ao I Concurso "Cantamos con las manos" convocado pola Federación de Asociacións de Persoas Xordas de Galiza (FAXPG) quedou gañador do mesmo xunto aos centros de Cambre e Guntín. Parabens a todos e todas e en especial á nosa infatigable Luísa Lombardero por ser a alma mater deste proxecto.
O venres día 23 fixéromnos entrega do agasallo como gañadores.
Moitas Grazas a FAXPG.

22/6/17

SUXESTIONS DE LECTURA PARA O VERÁN, 2017

"Para viaxar lonxe non hai mellor nave que un libro" Emily Dickinson.

Suxestions de lectura verán 2017 from Francisca Pérez

14/6/17

E GAÑAMOS!!!!!!!!!

O vídeo que o noso cole presentou ao I Concurso "Cantamos con las manos" convocado pola Federación de Asociacións de Persoas Xordas de Galiza (FAXPG) quedou gañador do mesmo xunto aos centros de Cambre e Guntín. Parabens a todos e todas e en especial á nosa infatigable Luísa Lombardero por ser a alma mater deste proxecto.

NO CPI AS MIRANDAS FESTEXAMOS O DÍA NACIONAL DAS LINGUAS DE SIGNOS ESPAÑOLAS QUE SE CELEBRA O 14 DE XUÑO

Hoxe 14 de xuño, queremos festexar o DÍA NACIONAL DAS LINGUAS DE SIGNOS ESPAÑOLAS (LSE) e amosar a presenza normalizada da LSE no ámbito educativo, en todos os niveis. Nel participan alumnado xordo e ouvinte, profesorado, intérpretes e mediadores comunicativos que forman parte dos centros educativos de Galicia.

E con motivo do Día Nacional das Linguas de Signos Españolas, no noso cole participamos no concurso "Cantamos con las manos" convocado pola Federación de Asociacións de Persoas Xordas de Galiza (FAXPG). Grazas a Luísa Lombardero, a nosa intérprete de signos, porque sen ela isto non sería posible.

Este foi o resultado, esperamos que vos guste!!!

31/5/17

CANTOS DE CEGO

Os alumnos e alumnas de 2º de E.P. fixeron un Cántico " Cantos de Cego " enmarcado dentro do proxecto de aula sobre a Idade Media " Quen fomos, Quen somos e Quen seremos ", este foi o resultado

29/5/17

CONTACONTOS NA BIBLIOTECA CARABELA

O ESCRITOR E CONTACONTOS IAGO LÓPEZ, FÍXONOS UN AGASALLO MOI ESPECIAL. VEUNOS CONTAR O SEU CONTO "O COCIÑEIRO MARTIÑO" MOITAS GRAZAS!!!

24/5/17

RECADACIÓN NO STAND DE UNHA CURA PARA ADRI

O noso centro recada 601,97 € no stand que montou na I Feira Dende Ares Cara o Mundo para colaborar con #UnhacuraparaAdri .

Gracias á profe Vanesa por montar e organizar as actividades realizadas no stand e a todas as rapazas que estiveron durante toda a xornada atendendo a toda esa xente riquiña que quixo visitar o stand e colaborar coa causa.

Gracias a tod@s pola vosa solidariedade, sodes grandes!!!

23/5/17

A BRUXA DO PAÍS DAS FANTASÍAS

Este conto escribiuno o grupo de valores de 2ºA dun xeito moi curioso: nunha mesa colocamos unha serie de folios en branco numerados e puxemos música; mentres soaba a música bailamos ao redor da mesa e, cando paraba, faciamos puntiños. Así ata que xa tivemos suficientes puntos, momento no que pasamos a unilos; e, cando xa houbo liñas a bondo, pasamos a debuxar, cada un onde lle tocaba en cada volta continuando os debuxos dos demais. Finalmente, recollimos os folios, coloreamos e inventamos o noso conto. E este foi o resultado:

Publish for Free

ÉXITO DA I FEIRA DENDE ARES CARA AO MUNDO

Non podemos estar máis que satisfeitos da xornada de hoxe na que se reflectiu o traballo colaborativo realizado no noso cole durante este curso e que deu como resultado a I Feira “Dende Ares cara ao mundo”.

Parabéns a toda a comunidade educativa: a todos os profes de infantil, primaria e secundaria, a todo o alumnado do centro desde os máis pequerrechos ata os máis maiores, que traballaron e colaboraron dunha maneira impecable, realizando unha gran labor en cada un dos stands representados; ás profes de música e as titoras polas actuacións musicais; aos que organizaron o stand de Unha cura para Adri que ,dito sea de paso, foi un acerto co apadriñamento de pingüins e o photocall dos países; ao noso paisano Javier Cristobo que sempre está aí cando precisamos del e que pasou a xornada con nós dando dúas estupendas charlas sobre a Antártida e inaugurando a Feira xunto cos representantes do CEFORE e autoridades do concello e asociacións de Ares; ao Concello e a ANPA pola súa inestinable axuda; á dirección do centro por promover e apoiar todas as inciativas que se están a levar a termo no noso centro e a todas as familias que hoxe nos acompañaron nesta xornada.

Nas seguintes fotos tedes unha pequena mostra do evento. En breve poderedes ver na páxina web do centro o vídeo resumo da I Feira dende Ares cara ao mundo.

Grazas a todos por facer que a xornada resultase todo un éxito.